Koop Scholten yn jannewaris al mei de krânse om
Koop Scholten yn jannewaris al mei de krânse om
Ús jongfeint Koop Scholten (80-plus) út De Wylgen hat op de twadde partij fan ‘e 55+ keatsers
yn it nije jier de earste priis wûn. Dit stiet te lêzen op de website Kaatsen.nl (‘Weer volle bak in
sporthal De Trije’).
Der diene yn Frjentsjer net minder as 108 keatsers oan mei. Trije fan harren giene mei in
krânse op hûs oan.
Dat wiene op ‘e foto f.l.n.r.: Koop Scholten yn ‘e C-klasse, Bertus de Jong, Drachten yn ‘e B-
klasse en Eddy Sjollema, Harns (21-10) yn ‘e A-klasse.
‘Dit wie myn earste krânse yn ‘e seal”, sei Koop. “Dat waard ek tiid.” Yn 2010 op de 55+ PC hie
hy ek de krânse. Dat wie yn Balk, mei in rit yn ‘e sjees nei ôfrin.
De 55+klup bestie yn desimber 25 jier. Dêr hat Koop 22 of 23 jier oan meidien.
In pear jier lyn sei Koop op ‘e Van Os-partij tsjin my: ‘Witst’ Durk, ik ha dit jier noch gjin priis
wûn’. Dat sjocht der dit jier hiel oars út. Mar yn jannewaris wisten we noch net dat it hiele
keatsseizoen op slot gean soe.
Durk Visser
